Kislorod konsentratori

Kislorod kontsentratori — atrof-muhit havosidan kislorod molekulalarini ajratib olish, ularni kontsentratsiya qilish va toza kislorod oqimi ko‘rinishida yetkazib berish uchun mo‘ljallangan qurilma. U kislorod terapiyasida qo‘llaniladi — bemorga atmosfera havosidagidan ancha yuqori kontsentratsiyadagi kislorod beriladi. Siqilgan kislorod ballonlariga nisbatan xavfsizroq va bir litrga hisoblaganda arzonroq bo‘lgani uchun muqobil sifatida qo‘llanadi.

Kislorod kontsentratorining ishlash prinsipi quyidagicha: qurilma ikki silindrdan iborat bo‘lib, xona havosi silindrlarning ichidagi seolit shariklaridan tashkil topgan “molekulyar elak”dan o‘tadi. Bu qatlam azot molekulalarini ushlab qoladi, kislorod molekulalarini esa o‘tkazadi. Natijada kontsentrator taxminan 95 % gacha bo‘lgan kislorod aralashmasini hosil qiladi.

Eng mashhur modellar kislorodni bir daqiqada o‘rtacha 3 dan 5 litr gacha yetkazib beradi. 2000-yillardan boshlab 10 l/min o‘tkazuvchanlikka ega bo‘lgan, lekin masso-gabarit ko‘rsatkichlarini saqlab qolgan modellar ham ishlab chiqarila boshlandi. XXI asr boshlarida ko‘plab ishlab chiqaruvchilar portativ kislorod kontsentratorlarini ham ishlab chiqara boshladilar. Ularning aksariyati 2 l/min dan oshmaydi, biroq kam uchraydigan, 5 l/min gacha tezlikka ega modellar ham mavjud.